سیفالله؛ د ماشومانو د روغتیا لپاره نهه کاله رضاکارانه خدمت
۲۸ کلن سیفالله له تېرو نهو کلونو راهیسې د پولیو واکسین په کمپاینونو کې د رضاکار په توګه کار کوي او د خپلې سیمې ماشومان واکسینوي.
پکتیکا، افغانستان (۸ زمری ۱۴۰۵) - د پکتیکا ولایت د یوسفخېلو ولسوالۍ پر غرونو لا د سهار رڼا نه وه خپره شوې چې ۲۸ کلن سیفالله د پولیو واکسین کمپاین په لړ کې د خپل ورځني ماموریت په لور روان شو.
دی او همکاران یې ټوله ورځ د خپلې سیمې محل په محل ګرځي او تر پنځو کلونو کمعمره ماشومان واکسینوي، څو له پولیو ناروغۍ څخه خوندي شي.
سیفالله د یوسفخېلو ولسوالۍ د براتخېلو کلي اوسېدونکی دی او له تېرو نهو کلونو راهیسې د پولیو واکسین په کمپاینونو کې د رضاکار په توګه کار کوي.
هغه وايي: «نه غواړم کوم ماشوم د پولیو له امله معلول شي. همدا فکر و چې د رضاکار په توګه مې کار پیل کړ.»
د رضاکارۍ پیل
سیفالله وايي، له ماشومتوبه یې لیدل چې د کورنۍ مشرانو یې د خلکو د ستونزو په حل کې مرسته کوله.
هغه د هماغو ورځو یوه خاطره داسې بیانوي: «تل مې لیدل چې زموږ د کورنۍ مشرانو به د خلکو د ستونزو په هوارولو کې مرسته کوله. هماغه وخت مې له ځان سره ویل چې کله لوی شم نو زه هم غواړم د خپلې ټولنې لپاره ګټور واوسم.»
کله چې د پولیو واکسین په کمپاین کې د رضاکارۍ فرصت ورته برابر شو نو د رضاکار په توګه ورسره یوځای شو.
یوازې واکسین نه، بلکې پوهاوی هم
د کمپاین په ورځ سیفالله او د هغه ټیم سیمه په سیمه ګرځي، ماشومان واکسینوي او د هغوی د روغتیا په اړه د کورنیو له مشرانو سره خبرې کوي.
دوی خلکو ته د مور د شیدو د ارزښت، د لاسونو د مینځلو، پاکوالي او د ناروغیو د مخنیوي په اړه هم معلومات ورکوي.
سیفالله وايي: «موږ یوازې واکسین نه ورکوو؛ بلکې هڅه کوو هرې کورنۍ ته دا پیغام هم ورسوو چې د ماشوم روغتیا د څو مهمو عادتونو مجموعه ده او واکسین یې مهمه برخه ده.»
په یوه عادي ورځ د هغه ټیم شاوخوا ۱۵۰ ماشومان واکسینوي او کورنیو ته یې روغتیايي پوهاوی ورکوي.
هغه وايي: «که یو ماشوم هم له واکسین څخه پاتې شي، هڅه کوم بېرته ورشم او ډاډ ترلاسه کړم چې واکسین شوی دی.»
©
له پولیو خلاص
افغانستان | ۱۴۰۵ لمریز
سیفالله یوې ماشومې ته د پولیو واکسین له ورکولو وروسته د هغې ګوته په نښه کوي.
باور د خبرو له لارې جوړېږي
د پکتیکا په غرنیو سیمو کې خلکو ته روغتیايي خدمتونه رسول له ننګونو خالي نه دي. اوږدې لارې او کله ناکله ناسم معلومات د واکسین له ټیمونو سره د خلکو د باور په جوړولو کې ستونزې رامنځته کوي.
سیفالله وايي، د رضاکارۍ په لومړیو کلونو کې ځینې کورنۍ د پولیو واکسین په اړه اندېښمنې وې.
خو هغه زده کړل چې باور د خبرو، حوصلې او درناوي له لارې رامنځته کېږي.
«موږ لومړی د خلکو خبرې اورو. هڅه کوو د هغوی اندېښنې درک کړو، بیا په ارامۍ او درناوي معلومات ورکوو.»
د باور جوړولو یوه تجربه
یوه ورځ د براتخېلو په کلي کې یوې کورنۍ خپل ماشوم ته د پولیو واکسین ورکول رد کړل. د ماشوم پلار د واکسین په اړه اندېښمن و او د ځینو اوازو تر اغېز لاندې راغلی و.
سیفالله لومړی د هغه خبرې واورېدې. وروسته یې د پولیو ناروغۍ، د واکسین د خوندیتوب او د ماشوم د راتلونکي د ساتنې په اړه معلومات ورکړل.
له لنډو خبرو وروسته، د کورنۍ نظر بدل شو او ماشوم واکسین شو.
سیفالله وايي: «هغه ورځ راته ثابته شوه چې کله خلکو ته غوږ ونیسو او درناوی یې وکړو، باور جوړېږي.»
د ماشومانو موسکا د ستړیا بدیل دی
د سیفالله لپاره د پولیو واکسین کمپاین یوازې یو رضاکارانه کار نه دی؛ بلکې د ماشومانو د راتلونکي د ساتنې یوه هڅه ده.
هغه وايي چې لیرې سیمو ته تګ او نورې ستونزې د هغه د هدف پر وړاندې خنډ نه دي.
«کله چې یو ماشوم واکسین شي، داسې احساس کوم چې د هغه د راتلونکي د خوندي کولو لپاره مې یو مهم ګام پورته کړ.»
©
له پولیو خلاص
افغانستان | ۱۴۰۵ لمریز
سیفالله د پولیو واکسین کمپاین پر مهال له واکسین شوو ماشومانو سره.
د کورنۍ ملاتړ
د سیفالله د رضاکارانه خدمت تر شا د هغه د کورنۍ ملاتړ هم شته.
د هغه پلار، فیض خان، تل ورته وایي: «د خلکو دعا او رضایت تر هرې مادي ګټې ډېر ارزښت لري.»
سیفالله وايي، د کورنۍ ملاتړ او د خلکو باور هغه هڅوي چې خپل کار د یوې دندې په توګه نه، بلکې د یوه ټولنیز مسوولیت په توګه ترسره کړي.
له پولیو پرته افغانستان هیله
سیفالله هیله لري چې یوه ورځ به افغانستان د پولیو له ناروغۍ څخه پاک شي او بیا به هېڅ ماشوم د دې ناروغۍ له امله له دایمي معلولیت سره نه مخ کېږي.
«زما هیله دا ده چې د هېواد ټول ماشومان روغ، فعال او له پولیو خوندي راتلونکی ولري.»
هغه ځوانانو ته هم پیغام لري: «د خلکو خدمت یوازې دنده نه ده؛ دا یو مسوولیت دی. که هر څوک د خپلې ټولنې لپاره په اخلاص کار وکړي، نو کولای شو د خپلو ماشومانو لپاره ښه راتلونکی جوړ کړو.»